खोपोली नगर परिषदेत वयोवृद्धांची गांधीगिरी!

 

* 67 वर्षीय ज्येष्ठ नागरिकाने बांधकाम अभियंता अनिल वाणींच्या दारात अर्धनग्न आक्रोश

* प्रशासनाच्या मुजोरीला कंटाळून शासकीय कार्यालयात न्यायासाठी कपडे काढले

* पाच वर्षांपासून गटाराच्या प्रलंबित कामासाठी 100+ फेऱ्या मारूनही दुर्लक्ष

* पोटं भरत नसतील तर आमचे कपडे घ्या, पण काम करा - संतप्त वृद्धाचा भावुक उद्गार

खोपोली / मानसी कांबळे - खलील सुर्वे :- एका 67 वर्षीय ज्येष्ठ नागरिकाला न्याय मिळविण्यासाठी रस्त्यावर उतरावे लागले, तेही अर्धनग्न होऊन...खोपोली नगर परिषदेच्या ढिसाळ, निष्क्रिय आणि अमानवी कारभाराने एका वयोवृद्धाला अक्षरशः गांधीगिरीचा मार्ग अवलंबवा लागला. ही घटना केवळ एका व्यक्तीची व्यथा नाही, तर संपूर्ण शहरातील प्रशासकीय उदासीनतेचे आणि बेजबाबदारपणाचे जिवंत उदाहरण आहे.

खोपोली येथील रहिवासी कस्तुरचंद चुनाजी राठोड (वय 67) हे गेल्या पाच वर्षांपासून आपल्या घरासमोरील गटार बांधकामाच्या प्रलंबित कामासाठी नगर परिषदेचे उंबरठे झिजवत आहेत. तब्बल शंभराहून अधिक फेऱ्या मारूनही नगर अभियंता अनिल वाणी आणि संबंधित प्रशासनाने त्यांच्या मागणीकडे पूर्णपणे दुर्लक्ष केले.

पावसाळ्यातील पाणी साचणे, दुर्गंधी, आरोग्य धोका हे सर्व सहन करीत - करीत अखेर त्यांची सहनशक्ती संपली. सोमवार, 2 फेब्रुवारी 2026 रोजी नगर परिषदेच्या कार्यालयात थेट अनिल वाणी यांच्या समोर जाऊन राठोड यांनी अर्धनग्न होत आंदोलन केले. हातात फलक घेऊन, भावुक होऊन त्यांनी उपस्थित अधिकाऱ्यांना आणि कर्मचाऱ्यांना विचारले की, “अधिकाऱ्यांची पोटं भरत नसतील तर आमचे कपडे घ्या... पण आमचे काम तरी करा!”

हा आक्रोश ऐकून उपस्थित नागरिकांच्या डोळ्यांत पाणी आले. एका वयोवृद्धाला अशा टोकाच्या पावलापर्यंत आणणाऱ्या प्रशासनाच्या मुजोरीबद्दल संताप व्यक्त होत आहे. “हे गांधीजींच्या सत्याग्रहासारखे आहे, अन्यायाविरुद्ध अहिंसक लढा, पण प्रशासनाने तरी जाग यावी!” अशी प्रतिक्रिया शहरवासीयांकडून येत आहे.

या घटनेनंतरही नगर परिषद प्रशासनाकडून कोणतीही ठोस कार्यवाही झालेली नाही. गटार काम सुरू होईल की नाही, याकडे आता संपूर्ण खोपोलीचे लक्ष लागले आहे. नागरिकांनी जोरदार मागणी केली आहे की, संबंधित अधिकाऱ्यांवर तात्काळ कारवाई व्हावी. राठोड यांच्या घरासमोरील गटार बांधकाम तातडीने सुरू व्हावे, नगर परिषदेच्या ढिसाळ कारभाराची चौकशी व्हावी.

खोपोली प्रशासनाने आता तरी जाग व्हावे...एका वयोवृद्ध नागरिकाच्या अश्रू आणि आक्रोशाने शहर जागे झाले आहे. अन्याय सहन करण्याची मर्यादा ओलांडली की, गांधीगिरीही टोकाची होते हे या घटनेने सिद्ध झाले. आता फक्त शब्द नाहीत, कृती हवी, अशी प्रतिक्रिया खोपोलीतून उमटत आहेत. खोपोलीचे मुख्याधिकारी डॉं. पंकज पाटील, नगराध्यक्ष कुलदीपक शेंडे, उपनगराध्यक्ष विक्रम साबळे, बांधकाम सभापती अनिल सानप सह खोपोलीतील सर्वपक्षीय नेते, लोकप्रतिनिधी वयोवृध्द कस्तुरचंद चुनाजी राठोड यांना न्याय देणार का ? की आमरण उपोषण, आंदोलन केल्याशिवाय राठोड यांना न्याय मिळणार नाही, असा प्रश्न उपस्थित होत आहे.