खोपोली शहरात खोपोली खालापूर तालूका संघर्ष समिती राबविणार नवीन संघर्ष पॅटर्न...

 

* शहराप्रती असणाऱ्या मागण्याचा गांभीर्याने विचार करून सुधारणा न केल्यास समस्याची काढणार प्रतिकात्मक अंत्ययात्रा व नागरिकांचा मोर्चा..

* सुविधा देत नसल्यास कर घेऊ नका यासाठी खोपोली शहरातील समस्यांबाबत संघर्ष समिती आक्रमक....

 *समस्या न सोडविल्यास जबाबदार अधिकारी यांच्यावर कारवाईची मागणी...

खोपोली/मानसी कांबळे :- खोपोली शहरात समस्यांचे पेव फुटलेले आहे.नागरी समस्या सोडविण्यात प्रशासन सपशेल अपयशी ठरत आहे.खोपोली खालापूर संघर्ष समितीच्या माध्यमातून नेहमीच प्रशासनाकडे विनम्र पाठपुरावा करीत असतो. परंतु बऱ्याच वेळा आश्वासन देऊन नंतर पाठ फिरविली जाते असा अनुभव वाढत आहे.तत्परतेने काम केल्यास खोपोली नगरपालिकेचे अधिकारी व कर्मचारी यांचा सन्मानही समितीकडून राखला जातो.

गेल्या काही महिन्यात शहराची अवस्था दयनीय झालेली आहे. पाण्याची समस्या,रस्त्याच्या समस्या,गटाराच्या समस्या,आरोग्याच्या समस्या,वाढत्या अनधिकृत टपऱ्या समस्या,वाहतूक समस्या,घंटा गाडी समस्या,नदी प्रदूषण समस्या,पार्किंग समस्या,गार्डनची समस्या,मुलांसाठी स्विमिंग पूल,क्रिडांगण समस्या,भाड्याने दिलेल्या मिळकत वरील आकरण्यात येणाऱ्या कराची समस्या,शहरातील वृक्षतोड समस्या,नाट्यगृह यासारख्या समस्या सोडविण्यात प्रशासन अपयशी ठरत आहे.वेळेत कर न भरल्यास दंडात्मक कारवाई करणारे प्रशासन सुविधा देण्यात कमी पडत आहे.नागरिक कर भरतात तर त्यांना सुविधा मिळणे हा हक्क आहे.नगरपरिषदेने नागरिकांची सनद म्हणून तक्रार आल्यानंतर कार्यवाही करताना निश्चित कालावधीत पूर्ण करीत नसल्याने त्या काळात ते काम न झाल्यास कर्तव्यपूर्ती न केल्याबद्दल त्या अस्थापनेस दंड म्हणून नागरिकांना आर्थिक सुट देण्यात यावी अशीही मागणी खोपोली खालापूर तालुका संघर्ष समितीच्या वतीने दिनांक 26 मे 2025 रोजी करण्यात आली.

दिनांक 27 मे 2025 रोजी संघर्ष समितीच्या वतीने काढण्यात येणाऱ्या प्रतिकात्मक अंत्ययात्रा व मोर्चा संदर्भात दिलेल्या पत्रावर खोपोली नगरपरिषदेने बोलविलेल्या 26 मे 2025 रोजीच्या विशेष चर्चा सत्रासाठी आयोजित केलेल्या मिटिंगमध्ये शहरातील सर्वच मुद्द्यावर सखोल चर्चा करण्यात आली.खोपोली नगरपालिकेने या समस्यांसंदर्भात लेखी भूमिका स्पष्ट करण्याचे मान्य केले असुन योग्य ती कारवाई न केल्यास पुन्हा मोर्चाचे आयोजन करण्यात येईल असे खोपोली खालापूर तालुका संघर्ष समितीच्या वतीने सांगण्यात आले आहे.यावेळी यावेळी खोपोली नगरपरिषदेचे उपमुख्याधिकारी रणजीत पवार,प्रभारी सभाध्यक्ष विश्वास पाटील,नगर अभियंता अनिल वाणी,सहाय्यक नगर रचनाकार साहिल गाढवे,रचना सहाय्यक प्रणयठाकूर,उपअभियंता( पाणीपुरवठा ) अविनाश भोईर,कनिष्ठ अभियंता सतीश हाडप तर खोपोली खालापूर तालुका संघर्ष समितीच्या वतीने ऍड रामदास पाटील,सुभाष पोरवाल,देवेंद्र जाखोटिया,मयूर जाखोटिया,राजेंद्र फक्के,नारायण खेडकर,प्रशांत साठे,नरेंद्र हर्डीकर,अजित ओसवाल,आशपाक लोगडे, डॉ. शेखर जांभळे,उत्तम पुनमिया,सचिन गुरसळ,मनोज खंडागळे, मोहन केदार,हितेन पाटील,दिवेश राठोड उपस्थित होते.

यावेळी घंटा गाड्यावर GPRS लावणे, घंटा गाड्या वेळेवर येत नसल्याने अस्वछता,पिण्याचे पाणी वेळेवर सोडणे,गटार वेळेत साफ न केल्याने होणारे अस्वछता,शहरात सर्व ठिकाणी लावलेले कचरा संकलन स्टिकर समस्या,दवाखान्यातील समस्या, शहरातील वाढत्या टपऱ्या, एकेरी वाहतुकीचे व्यवस्थित नियोजन, नदी प्रदूषित करणाऱ्यावर कारवाई,शहरातील पार्किंग व्यवस्था, गार्डन योग्य प्रकारे नसल्याने होणारे नागरिकांचे हाल, स्विमिंग पुलची उपलब्धता, शहरातील वाढलेले वृक्ष व वृक्षतोड,नाट्यगृहाच्या दुरावस्थेस जबाबदार असणाऱ्यावर कारवाई, क्रिडांगणाची आबाळ, रस्त्यावर पडलेले खड्डे, सर्वांना समान घरपट्टी आकारणी, दोन वेळच्या पाण्याचे नियोजन, शहरातील पाईप लाईनचे ले आऊट यासारख्या बाबींवर प्रश्नांची व भविष्यातील नियोजनाची सरबत्ती करण्यात आली.या सर्व प्रश्नांवर लेखी उत्तर देऊन भविष्यात शहर नियोजनात सतर्कतेने लक्ष दिले जाईल असे प्रशासनाने सांगितले आहे.

आज झालेल्या चर्चेत संघर्ष समितीच्या शिष्टमंडळाने प्रशासन सुविधा देत नसल्यास कर घेऊ नका यासाठी खोपोली शहरातील समस्यांबाबत संघर्ष समिती आक्रमक असुन वेळेत समस्या न सोडविल्यास जबाबदार अधिकारी यांच्यावर कारवाईची मागणी करणार असुन खोपोली शहरात खोपोली खालापूर तालूका संघर्ष समिती राबविणार नवीन संघर्ष पॅटर्न राबविणार असुन जनहीत याचिका दाखल करणार असुन शहराप्रति असणाऱ्या मागण्याचा गांभीर्याने विचार करून सुधारणा न केल्यास समस्याची काढणार प्रतिकात्मक अंत्ययात्रा व नागरिकांचा मोर्चा काढणार असल्याचे खोपोली खालापूर तालुका संघर्ष समितीने स्पष्ट केले आहे.