गाव बदलायचं असेल तर सरपंच डोकेबाज पाहिजे – भास्करराव पेरे पाटील....

 

माळशिरस / अनिल पवार : श्री हनुमान जन्मोत्सवानिमित्त मौजे शिंदेवाडी येथे आयोजित प्रेरणादायी व्याख्यानाला ग्रामस्थांचा उत्स्फूर्त प्रतिसाद मिळाला. या कार्यक्रमासाठी पाटोदा गावाचे आदर्श सरपंच भास्करराव पेरे पाटील प्रमुख वक्ते म्हणून उपस्थित होते.

या व्याख्यानाचा उद्देश पाटोदा गावाच्या विकासाचा आदर्श समोर ठेवून शिंदेवाडीच्या सर्वांगीण विकासाला दिशा देणे हा होता. आपल्या प्रभावी आणि साध्या शैलीतील भाषणात पेरे पाटील यांनी सांगितले की, गावविकासासाठी केवळ निधी नव्हे, तर योग्य नियोजन, पारदर्शकता आणि प्रामाणिक नेतृत्व अधिक महत्त्वाचे असते.

यावेळी त्यांनी पाटोदा गावात राबविण्यात आलेल्या विविध उपक्रमांची माहिती दिली. यात स्वच्छता मोहीम, पाणी व्यवस्थापन, शिक्षण व डिजिटल सुविधा, ग्रामस्थांचा सक्रिय सहभाग, वृक्षारोपण तसेच अतिक्रमण निर्मूलन यांसारख्या कामांचा समावेश होता. “सरपंचाकडे प्रामाणिक इच्छाशक्ती असेल, तर गावाचे चित्र बदलू शकते,” असे त्यांनी ठामपणे नमूद केले.

तसेच ग्रामविकासासाठी सर्वांनी एकत्र येण्याचे आवाहन करत, “गाव हा आपला परिवार आहे आणि त्याची जबाबदारी प्रत्येकाची आहे,” असेही त्यांनी सांगितले. “जर पाटोदा गाव बदलू शकते, तर शिंदेवाडीही नक्की बदलू शकते; त्यासाठी सरपंच डोकेबाज पाहिजे,” या त्यांच्या विधानाने उपस्थितांमध्ये उत्साह संचारला.

या व्याख्यानामुळे गावकऱ्यांमध्ये नवचैतन्य निर्माण झाले असून अनेकांनी विकासकामांसाठी पुढाकार घेण्याचा निर्धार व्यक्त केला. अशा प्रेरणादायी कार्यक्रमांमुळे ग्रामीण विकासाला निश्चितच गती मिळेल, असा आशावाद व्यक्त होत आहे.