कन्या रत्न सन्मान उपक्रमाचा वर्धापन दिन साजरा; ‘मायेची चिट्ठी – आशीर्वाद पत्र’ उपक्रमाचा शुभारंभ ....

 

सहज सेवा फाउंडेशन व सहज महिला फाउंडेशनचा अनोखा सामाजिक उपक्रम

खालापूर कर्जत /सुधीर देशमुख :- दिनांक ८ मार्च २०२५ रोजी जागतिक महिला दिनाच्या निमित्ताने सहज सेवा फाउंडेशन व सहज महिला फाउंडेशन यांच्या वतीने “कन्या रत्न सन्मान” हा सामाजिक उपक्रम सुरू करण्यात आला होता. समाजात कन्या जन्माचा सन्मान व्हावा, स्त्रीशक्तीचा गौरव व्हावा आणि सकारात्मक सामाजिक संदेश पोहोचावा, या उद्देशाने हा उपक्रम सातत्याने राबविण्यात येत आहे.

या उपक्रमाच्या माध्यमातून गेल्या वर्षभरात १०३ मातांचा सन्मान करून कन्या जन्माचा आनंद समाजासमोर साजरा करण्यात आला आहे.

या उपक्रमाच्या वर्धापन दिनानिमित्त या कार्यात मोलाचे सहकार्य करणाऱ्या सौ. कमल पाटील, खोपोली नगरपरिषदेचे मुख्याधिकारी डॉ. पंकज पाटील तसेच श्री कलेक्शन, खोपोली यांचा विशेष सन्मान करून त्यांचे मनःपूर्वक आभार मानण्यात आले.

याच वर्धापन दिनानिमित्त “मायेची चिट्ठी – आशीर्वाद पत्र” या नवीन उपक्रमाचा शुभारंभ करण्यात आला. खालापूर नगरपरिषदेच्या पहिल्या नगराध्यक्षा तसेच सहज सेवा फाउंडेशन व सहज महिला फाउंडेशनच्या मार्गदर्शिका शिवानी जंगम यांच्या हस्ते या उपक्रमाची सुरुवात करण्यात आली.

या उपक्रमांतर्गत ज्या कन्येचा वाढदिवस असेल त्या कन्येला संस्थेमार्फत मायेचे आशीर्वादरूपी पत्र पाठविण्यात येणार आहे. यामधून समाजात कन्या जन्माचा सन्मान आणि स्त्रीशक्तीचा गौरव अधिक बळकट करण्याचा प्रयत्न करण्यात येत आहे.

या उपक्रमात सहकार्य करणाऱ्या व्यक्तींचा सन्मान सहज सेवा फाउंडेशनचे अध्यक्ष डॉ. शेखर जांभळे, सचिव अखिलेश पाटील, खजिनदार संतोष गायकर, जनसंपर्क प्रमुख जयश्री कुलकर्णी, खालापूर तालुकाप्रमुख मोहन केदार, मार्गदर्शक अशपाक लोगडे, सल्लागार नरेंद्र हार्डीकर तसेच सहज महिला फाउंडेशनच्या अध्यक्षा निलम विलास पाटील आणि उपक्रम प्रमुख सागरीका जांभळे यांच्या हस्ते करण्यात आला.