एक भावूक निरोप : लोकनेत्याच्या स्मृतींना खोपोलीकरांचे अभिवादन

 

खोपोली / मानसी कांबळे :- आजचा दिवस खालापूर तालुक्यासाठी अत्यंत जड अंतःकरणाचा आणि भावूक करणारा ठरला. जनसामान्यांचे नेते, स्वर्गीय उपमुख्यमंत्री अजितदादा पवार यांचा अस्थिकलश आज दर्शनासाठी खालापूर तालुक्यातील विविध गावांतून फिरवण्यात आला. ज्या हातांनी विकासाची गंगा घराघरांत पोहोचवली, आज त्याच नेतृत्वाच्या पवित्र स्मृतींचे दर्शन घेतांना प्रत्येकाचे डोळे पाणावले होते.

* खोपोलीत जनसागराची श्रद्धांजली :- आज खोपोली शहरातील राष्ट्रवादी काँग्रेसच्या मध्यवर्ती जनसंपर्क कार्यालयात हा अस्थिकलश दर्शनासाठी ठेवण्यात आला होता. आपल्या लाडक्या नेत्याला अखेरचा मुजरा देण्यासाठी सकाळपासूनच खोपोलीकरांनी गर्दी केली होती. कार्यालयाचा परिसर केवळ एका राजकीय पक्षाचे कार्यालय न राहता, आदरांजली वाहणाऱ्या एका विशाल कुटुंबाचे केंद्र बनले होते.

* राजकारण पलीकडची आदरांजली :- उपमुख्यमंत्री अजितदादांचे व्यक्तिमत्व हे केवळ एका पक्षापुरते मर्यादित नव्हते, हे आज पुन्हा एकदा सिद्ध झाले. याप्रसंगी खोपोली शहरातील सर्वच राजकीय पक्षांचे ज्येष्ठ नेते, खोपोली नगर परिषदेचे सर्व पक्षांचे नगरसेवक व नगरसेविका, तसेच नगराध्यक्ष आणि उपनगराध्यक्ष यांनी आवर्जून उपस्थित राहून दादांच्या पवित्र स्मृतींना पुष्पहार अर्पण केला