शेडवी फाट्याजवळ वॅगनर कारचा भीषण अपघात

 

जुना मुंबई - पुणे राष्ट्रीय महामार्गावर सकाळी घटना ; चार जण जखमी, जीवितहानी टळली

खोपोली / खलील सुर्वे :- जुना मुंबई - पुणे राष्ट्रीय महामार्ग क्रमांक 4 वर शेडवी फाटा येथे मंगळवारी सकाळी साडेपाचच्या सुमारास वॅगनार कारचा अपघात झाला. या अपघातात कारमधील चार जण जखमी झाले असून, सुदैवाने कोणतीही जीवितहानी झाली नाही.

खोपोलीहून मुंबईच्या दिशेने जात असलेली वॅगनार कार (क्रमांक MH 46-BE 1435) भरधाव वेगात असताना चालकाचे वाहनावरील नियंत्रण सुटले. त्यानंतर कार रस्त्याच्या कडेला जाऊन थेट मोरी भागात कोसळली, त्यामुळे हा अपघात घडला. अपघाताचा मोठा आवाज झाल्याने परिसरात एकच खळबळ उडाली.

अपघातात जखमी झालेल्यांना तातडीने मदतीसाठी जाखोटीया हॉस्पिटल येथे उपचारासाठी दाखल करण्यात आले आहे. जखमींची प्रकृती स्थिर असल्याची प्राथमिक माहिती मिळाली आहे. सुशीला कृष्णा ठोंबरे, रिया फाटे, दत्ता चिंधु पाटील हे जखमी झाले असून एका जखमीचे नाव अद्याप समजू शकलेले नाही.

दरम्यान, घटनेची माहिती मिळताच स्थानिक नागरिकांनी मदतीसाठी धाव घेतली. वाहतूक काही काळ विस्कळीत झाली होती. या अपघाताचा पुढील तपास संबंधित यंत्रणांकडून सुरू आहे.