गुरुकुल ऑलिंपिक 2025 ची शानदार सुरुवात

रायगड जिल्ह्यातील 32 शाळांचा सहभाग

चौक / प्रतिनिधी :- श्री स्वामीनारायण गुरुकुल आंतरराष्ट्रीय शाळेत आयोजित ‘गुरुकुल ऑलिम्पिक २०२५’ या भव्य क्रीडा स्पर्धेला आज बुधवार दि. २६ नोव्हेंबर २०२५ ला सकाळी १०. ०० वा.शाळेचे संचालक परमपूज्य आदरणीय विश्वमंगलदास स्वामीजी आणि परमपूज्य ब्रम्हस्वरूपदास स्वामीजी यांच्या मार्गदर्शनाखाली व शाळेचे प्राचार्य डॉ. हरिबाबू रेड्डी सर यांच्या नेतृत्वाखाली उत्साहात सुरुवात झाली. उद्घाटन सोहळ्याला प्रमुख पाहुणे म्हणून विशाल पवार सर (API), सुनील गायकवाड (माजी उपसरपंच), सुधीर माने (अध्यक्ष, न्यू जर्नलिस्ट असोसिएशन महाराष्ट्र) व आबासाहेब मोरे सर, शिवाजी भासे, शाळेचे सर्व शिक्षकवर्ग आणि असंख्य विद्यार्थी वर्ग मोठ्या उपस्थित होते.

       या स्पर्धेमध्ये सुमारे ३२ शाळांनी सहभाग नोंदवला असून चार तालुक्यांतील शेकडो विद्यार्थी विविध क्रीडा प्रकारांत आपली प्रतिभा सादर करणार आहेत. स्पर्धा २६, २७ आणि २८ नोव्हेंबर रोजी तीन दिवस सुरू राहणार असून विजेत्या खेळाडूंची पुढील नामांकन प्रक्रियेसाठी निवड केली जाणार आहे.

      उद्घाटन सोहळ्यात मान्यवरांनी विद्यार्थ्यांना प्रोत्साहन देत सांगितले की, अशा स्पर्धांमुळे शारीरिक, मानसिक तसेच चारित्र्य विकासाला उत्तम दिशा मिळते. गुरुकुल संस्थेच्या उत्तम नियोजन व आयोजनाबद्दल मान्यवरांनी प्रशंसा व्यक्त केली.

      गुरुकुल ऑलिम्पिक २०२५ या स्पर्धेमुळे परिसरातील क्रीडा संस्कृतीला नवी गती मिळण्याची अपेक्षा व्यक्त केली जात आहे.