खोपोलीत आज अजित पवारांची जाहीर सभा

 

* परिवर्तन विकास आघाडीसाठी उमेदवारांना बळ

* डॉ. सुनील पाटील नगराध्यक्षपदासाठी सक्षम

* खोपोलीच्या विकासाला नव्या वाटा - संतोष चौधरी

खोपोली / प्रतिनिधी :- खोपोली नगर परिषद निवडणुकीच्या पार्श्वभूमीवर परिवर्तन विकास आघाडीच्या प्रचाराने वेग घेतला आहे. राष्ट्रवादी काँग्रेस (अजित पवार गट), शिवसेना (उद्धव ठाकरे), शेतकरी कामगार पक्ष व सोशलिस्ट रिपब्लिकन पार्टी यांच्या संयुक्त परिवर्तन विकास आघाडीचे थेट नगराध्यक्ष पदाचे उमेदवार डॉं. सुनील गोटीराम पाटील यांच्यासह सर्व उमेदवारांच्या प्रचारार्थ आज भव्य जाहीर सभा आयोजित करण्यात आली आहे.

ही सभा उपमुख्यमंत्री व अर्थमंत्री तसेच राष्ट्रवादी काँग्रेसचे राष्ट्रीय अध्यक्ष अजित पवार आणि प्रदेशाध्यक्ष खासदार सुनील तटकरे, रायगड जिल्हाध्यक्ष सुधाकर घारे यांच्या प्रमुख उपस्थितीत डॉं. बाबासाहेब आंबेडकर स्मारकासमोर, रात्री 8 वाजता होणार आहे.

* खोपोलीला उभारी देण्यासाठी घड्याळाच्या बटणावर एकत्र या - संतोष चौधरी :- पोलिस मित्र संघटना, नवी दिल्लीचे संस्थापक अध्यक्ष संतोष चौधरी यांनी परिवर्तन आघाडीच्या प्रचाराची धुरा हाती घेतली आहे. त्यांनी खोपोलीकरांना आवाहन करताना म्हटले की, खोपोली नगर परिषदेत डॉं. सुनील पाटील यांच्या रुपाने सत्ता दिल्यास अर्थमंत्री अजित पवारांची ताकद त्यांच्यामागे भक्कमपणे उभी राहील.

नगराध्यक्ष म्हणून काम करताना डॉं. पाटील यांनी खोपोली शहराच्या विकासाला जणू आजारातून उठवले होते. मागील पाच - सात वर्षांत सत्ताधाऱ्यांनी आणि प्रशासकांनी शहराच्या विकासाला खोडा घातला. रायगड तसेच कोकणातील सर्वात श्रीमंत नगर परिषदेचा विकास रखडला आहे.

चौधरी यांनी पुढे सांगितले की, खोपोलीच्या विकासाची नवी वेळ आली आहे. शहर बदलण्यासाठी घड्याळाच्या निशाणीवर एकदिलाने मतदान करा. परिवर्तन विकास आघाडीतील सर्व उमेदवारांना विजयी करण्यासाठी संतोष चौधरी यांनी स्वतःची ताकद, नेटवर्क व रणनिती पूर्ण क्षमतेने झोकून दिली आहे.

* डॉ. सुनील पाटील - अनुभवी नेतृत्वाने सज्ज :- नगराध्यक्षपदाच्या उमेदवारीमुळे खोपोलीत पुन्हा एकदा विकासाची नवी दिशा मिळेल, असा विश्वास आघाडीच्या पदाधिकाऱ्यांनी व्यक्त केला आहे. डॉं. पाटील यांनी यापूर्वी केलेल्या विकासकामांमुळे त्यांची कार्यक्षमता, पारदर्शकता आणि विकासाभिमुख दृष्टी अनेकांना आकर्षित करीत आहे.